నీ తోడు...

కొన్నిసార్లు ఆవేశంతో
కొన్నిసార్లు ఆత్రుతతో
మరికొన్నిసార్లు అసంతృప్తితో
ఎన్నో ప్రశ్నార్ధకాల పరిహాసాల నడుమ
పరుగులు పెడుతుంటాను దేనికోసమో

నామది నెమ్మదించడానికి
నువ్వు గుర్తొస్తే చాలు
ఒక హయైన భరోసా !

నీమాటతోనో...స్పర్శలోనో
ప్రశ్నలన్నీ ఆవిరయిపోతూ
అద్దంలాంటి నీచిరునవ్వు
నను గెలుస్తూ...గెలిపిస్తూ...
నీతోడు నిజంగా...
ఒక అందమైన మాయ!!

కిటికీ

మంచు పడినా, మనసు బాగోకపోయినా
వాన కురిసినా, వడగాల్పులీచినా
అన్నిటికీ అదే కిటికీ
ఎన్నో నిర్వచనాలకు నిదర్శనంగా....!!

నీ ఊహలో...

చంద్రకిరణం
మంద్రస్థాయిలో మెత్తని రాగం
నీకౌగిలిలో భద్రతాభావం
అన్నీ నిన్నలో కలిసిపోయాయి

నీజ్ఞాపకాలన్నీ మీదేసుకుని
బ్రతకడంకంటే
పోగేసుకుంటూ నీతో జీవించాలనుంది.
*****

చెమ్మగిల్లిన నీ కళ్ళు చెబుతున్నాయి
నీ గుండెకు నేనెంత చేరువయ్యానో!
ఇది చాలదూ...
చెరగని జ్ఞాపకమై చివరికంటూ వెంటాడడానికి!
*****

ఏదో నాపిచ్చిగానీ ....
అక్షరాల్లో నిను బంధించాలనుకోవడం
తాత్కాలిక ఉపశమనం
ఆగిన కలంతో పాటు
మళ్లీ ఆయువు పోసుకుంటుంది వెలితి
*****

నీ కన్నీటిబొట్టు
నాహృదయం బరువు
సమానంగా తూగుతున్నాయి
మన బ్రతుకుపాట వినిపించినప్పుడల్లా...
*****

ఈరోజెందుకో అంతా ఖాళీగా,
అన్నీ ఒకేలాగా....
మనసులోతుల్లో మౌనంగా
అక్కడే మిగిలిపోతున్నా
'ఇదీ' అనీ తెలికపోవడం
ఎంత నరకం!!

నువ్వు...నేను....వర్షం

నువ్వు...నేను....వర్షం
ఆకాశం ...భూమి....హర్షం
గమ్మత్తుగా లేదూ
మొన్నటి మన పరిచయం నుండి
నిన్నటి వియోగం వరకు ఇదే తంతు.

చైత్రమాసపు చినుకులన్నిటిలో ఒకచైతన్యం
చిందులతో నీచిత్రాన్నే గీస్తున్నాయి
గర్వంగా వుంది కదూ!!

ప్రకృతిలోని
ప్రతి ఆకు, పూరేకులోను
నీతో గడిపిన నిమిషాలే!
రాలిపోతున్నా రాత్రిపూలై
రాగాలాలపిస్తూనేవున్నాయి
ఎదలోతుల్లో....

మెడఒంపులో నీమౌనరాగాలు
పాదాలతో నీపెదాలు చేసిన ప్రమాణాలు
నీకూ నాకూ నడుమ ఎన్నో నిశ్శబ్దక్షణాలు
కుదురులేని ఈభావప్రకంపనలకు ఆనకట్ట
నీకౌగిలోక్కటే అని తెలుసు

తృప్తిపడ్డ యవ్వనపు తాలుకు ఆనందాన్ని
మోసుకొస్తూ. ..
తళుక్కుమన్న సన్నటి కన్నీటిపోర
తాకి చూసి చెప్పావు గుర్తుందా
జన్మ తరించిందని .
నేను హామీ ఇవ్వగలను
నీతో జీవితం నాకిష్టమైన కవిత్వం

కరుగుతున్న కన్నీరు సాక్షిగా
నువు కావాలనిపిస్తుంది
కాలం కలసివస్తే
మళ్లీ కలుద్దాం నేస్తం!!

ఒక పునరావృత సత్యం

కళ్ళ ముందు క్షణాలన్నీ
మెల్లిగా చుక్కల్లో
చేరుకుంటాయి
మినుకుమనే మెరుపొక్కటే
మిగులుస్తూ!

ఎన్ని కాలాలు
కరిగిపోవడంలేదు
ఇలాగే...!!

ఒంటరితనం...మౌనం
ఏకాంతం...నిశ్శబ్ధం
మెత్తగా కోసే
పదునైన కోణాలన్నిటినీ
కేంద్రీకరించుకుని
కూర్చున్నట్టుంటాయి

తరచి తరచి వెంటాడుతూ...
మునిగి తేలినప్పుడల్లా
స్పష్టత కోసం పొర్లాడుతూ
సశేషంలా
సగంచిత్రమే ఎదురవుతుంది

పిచ్చిమొక్కకున్నపాటి పచ్చదనం
నామనసుకు లేదేమని
ఎన్నిసార్లు తడుముకున్నానో!!
ఎండైనా, వానైనా
నాకైనా, తనకైనా ఒకటేగా

సమాప్తమయ్యేదాకా
తేలని సత్యమేలే ఇది!

కొన్ని పూలు

మనకోసమూ
కొన్ని పూలు
పూస్తుంటాయి

ఎదురుపడుతూ
ఎదర దూరాన్ని
పలచన చేసేందుకు

ఆ పరిమళాలను
గుండెల్లో నింపుకుంటూ
పయనించడమే...!!

*****Wrote this on my friend Seethu Premanjali's birthday *****

ఏకాంతం

వస్తూ వస్తూ
వుత్సాహాన్ని
బహుమతిగా తెస్తే

సావాసమంటూ
సంగీతం పిలుస్తుంది
ఇక గాలిదేవుడికి
కితకితలే

విసిరేయడానికి
ఎంతబాధో తెలిసినా
అందమైన ఆలోచనల్ని
ఏరుకుంటూ అల్పసంతోషానికి
ఆయువు పోస్తుంది మనసు

ఏడురంగుల భావుకత్వంతో
ఇల్లంతా అలికి
దిష్టిచుక్కనవుతా
తలుపు తడుతున్న శబ్దానికి.
ఇదంతా నాణేనికి ఒకవైపే

మరోవైపు....
నిశ్శబ్దాన్ని
గుండెలమీదేసుకుని
జోకోట్టిన ఏకాంతాలెన్నో.