కొన్ని గోరువెచ్చని సాయంకాలాలు వుంటాయి

మెత్తని పచ్చికలో
నీ నులివెచ్చని నాజూకు గుర్తులు
మలిరేయి వెన్నెల్లో
అందంగా మెరుస్తున్నాయి

నీ ఆలోచనల్లో వుండే గుణమే అది,
ఏదైనా హత్తుకునేట్టు చెప్పించుకోవడం! 
అయినా
మనిద్దరి సహజీవనానికి
కాలాలతో పని లేదు కదూ !
 
వున్నట్టుండి 
ఒకరోజు ఎడతెరిపి లేని వర్షం
కురుస్తూనే వుంటుంది ,
గుండెకి చిల్లు పడిందా అనేలా.

మరో రోజు
మంచు కురుస్తూనే ఉంటుంది
ఘనీభవించిన
మమతల సెలయేరుని
మరింత మూసేస్తూ...

కొన్ని గోరువెచ్చని సాయంకాలాలు వుంటాయి,
నీ స్వరాన్ని మోసుకొస్తూ,
నా ప్రవాహాన్ని సమతుల్యం చేస్తూ!