‎'శిశిరం'
ఆ పదం పలికితేనే శీతగాలి సందడిలో
సూర్యుడే గుర్తుకు రాడు
అచ్చంగా గతమయిపోదు
పూర్తిగా ప్రస్తుతమూ కాదు
ఆకాశమంతా సంద్రమయిపోతుంది

రంగుల పత్రాలలో...రాలే ఆకులలో
ఎన్నేసి రహస్యపుపోగులు
చేధించేకొద్దీ జీవితం
నచ్చడం మొదలెడుతుంది

వచ్చిపోయే వానచుక్కలతో
నలుమూలలు చెరిపేసి,
సాచిన చేతికందినన్ని రంగులు తెచ్చి
అణువణువుకూ అద్దాలనిపిస్తుంది

ఎండుటాకుల మీద స్కూలు పిల్లాడి అడుగులతో
రంగుల్లో దాక్కున రోడ్డు మలుపులతో
నిశ్శబ్దరాగాలు
మనసారా మాట్లాడే ఋతువిది!!!!