కొన్ని పూలు

మనకోసమూ
కొన్ని పూలు
పూస్తుంటాయి

ఎదురుపడుతూ
ఎదర దూరాన్ని
పలచన చేసేందుకు

ఆ పరిమళాలను
గుండెల్లో నింపుకుంటూ
పయనించడమే...!!

*****Wrote this on my friend Seethu Premanjali's birthday *****

ఏకాంతం

వస్తూ వస్తూ
వుత్సాహాన్ని
బహుమతిగా తెస్తే

సావాసమంటూ
సంగీతం పిలుస్తుంది
ఇక గాలిదేవుడికి
కితకితలే

విసిరేయడానికి
ఎంతబాధో తెలిసినా
అందమైన ఆలోచనల్ని
ఏరుకుంటూ అల్పసంతోషానికి
ఆయువు పోస్తుంది మనసు

ఏడురంగుల భావుకత్వంతో
ఇల్లంతా అలికి
దిష్టిచుక్కనవుతా
తలుపు తడుతున్న శబ్దానికి.
ఇదంతా నాణేనికి ఒకవైపే

మరోవైపు....
నిశ్శబ్దాన్ని
గుండెలమీదేసుకుని
జోకోట్టిన ఏకాంతాలెన్నో.

నీ స్నేహం

ఆకాశం నుండి
రాలిపడ్డ నక్షత్రాలను
దూరంగా కొండమీదకెళ్లి
ఏరుకున్నాము ఎన్నోరాత్రులు

ఎవరెవరిలోనో
నిన్ను వెతుక్కున్నప్పుడు
అచ్చం
నువ్వే కావాలనిపించే క్షణంలోనూ...

పెదవంచుకోచ్చి
మెరుస్తుంటాయి ఇప్పటికీ.

***For my best friend Bindu***

అమ్మ

అమ్మ తన కళ్ళని
గేటుకి అంటించేది
నేనొచ్చానా....ఇక
తనెవరో? గేటేవరో?
మరుసటిరోజు దాకా

అమ్మ తన హృదయమే
నాకిచ్చేసింది
నేవదిలివెళ్తుంటే
తనక్కడ! మనసిక్కడ!
మళ్ళీ నన్ను చూసేదాకా

ఒంటరి చెట్టు

నేనో ఒంటరి చెట్టును...

కొత్త వెలుగుల కోసం

ఆరాటపడుతూ

పొద్దున్నే లేచి

సాయంత్రానికి గూటికి చేరే

సూరీళ్ళెందరో

నా ముందు నుంచే వెళ్తారు

ఈమధ్యలో

ఎన్నిరకాల పిట్టలని!

చక్కిలిగింతలు పెట్టి

చక్కా ఎగిరిపోతాయి

విచ్చుకునే వసంతానికి

ముందొచ్చే అల్లరిగాలొకటి

ఊపిరి పోసుకుంటున్న

నా పచ్చని చిగుళ్ళకు

ఓనమాలు నేర్పిస్తుంది

ఉడుకెత్తే వేసవిలో

విసుగెత్తి తను వస్తే

నా ఆకులు

గలగలా మాట్లాడుతూ

ఊరటనివ్వాలిగా మరి!

వర్షం కురిసినప్పుడల్లా

తోచినన్ని నీళ్ళు తాగేసి

తలదించుకు కూచుంటాను

కొమ్మలు

యేవైపున పెంచితే

అందంగుంటానో

ప్రణాళికలు వేస్తూ

ఒంటరితనంలోని హాయిని

ఆస్వాదిస్తూ

అప్పుడప్పుడు

నానీడలోకి

తొంగిచూస్తుంటాను

నిశ్శబ్దంలో

నిద్రపట్టని రాత్రిలో
మనసుకందిన భావంపై
అక్షరాలూ పేరుస్తూ
నప్పనివాటిని తప్పుకోమంటుంటే
ఎన్ని పదనిట్టూర్పులు
*****

నీటిమడుగుల్లో
ఎండిన మరకల్లో
రాళ్ళసృష్టిలో
ఎన్ని సజీవాకారాలో
కళ్ళతో ప్రాణం పోయాలేగానీ
*****

ఒక్కోసారి
కళ్ళ ముందు కాస్తున్న ఎండను
గాలి మోసుకొచ్చే పరిమళాలను
ఇదివరకేప్పుడో
అనుభవించినట్టుగా అనిపిస్తుంది
వెంటనే
మనసు ఒంటరిదవుతుంది
*****

ఒక్క మబ్బు పట్టిన క్షణం చాలు
గతంలోనూ, వర్తమానంలోనూ
నిశ్శబ్దాన్ని నింపడానికి
అయినా
నిర్లిప్తత దూసుకెళ్లినంత లోతుకు
సందడి తోసుకెళ్ళలేదేందుకో
*****

ఎన్ని సుఖదుఃఖాలను
ఎంత గొప్పగా మోస్తుంది
చావుపుట్టుకల్లేని కాలం
మరి నేనెందుకు
పొంగిపోతూ, కృంగి పోతూ?
ఎంతకాలమో మోయనని తెలిసినా!

తూర్పు - పడమర

తూర్పున ఏం సాధించాడో ఏమోగానీ
పడమరవైపుకి సూరిబాబొచ్చాడు
అంతా నిశ్శబ్ధం......కాకుల అరుపు
పాలవాడి పిలుపు లేవు మరి

అద్దంలో నా ముఖం....పుణ్యమేలే
ఏం జరిగినా ఎవరిని తిట్టుకోనక్కర్లేదు
పెళ్ళయిందన్న సంగతి మర్చిపోయినట్టున్నా
పాపం తను వెళ్ళిపోయాడు
ఒక్క కాఫీతో సరిపెట్టుకుని
ఎంత సంపాదించి ఏం లాభం??

సరే సీరియల్ తింటా
అన్నీ వున్నాయట ఒక్క 'అమ్మ చేతి రుచీ తప్ప
కంప్యూటర్ దగ్గరకెళ్తున్నా....
కడుపులో ఆకలి, పక్కన అన్న అవసరం లేదు

డిష్ వాషర్ దాని భాషలో ఏదో శబ్ధం చేస్తుంది
మాపనిపిల్ల పాటకి పంపులో నీళ్ళు కూడా
ఎంత లయబద్దంగా జారేవో!
ఏముందిలే కొన్నిరోజుల్లో అదీ అర్ధమవుతుంది

ఓసారి బయటప్రపంచాన్ని పలకరించాలనుంది
మా డాబా సైజ్ ని ఈకిటికీలోకి కుక్కేసాను
నైట్ డ్రెస్స్ అవతారానికి కాపీరైట్స్ తీసుకున్నట్టున్నాను మరి!
అక్కడయితే అమ్మ రోజూ దిష్టి తీసేది.

స్నానం కూడా చెయ్యాలా ఇంత చల్లగా వుంటేను
కొయ్యబారేలా చేసే ఈ రాక్షసచలెక్కడ...?
చెంబు చెంబు కి మధ్య చక్కిలిగింతలు పెట్టే
మన శీతాకాలపు చిరుచలెక్కడ?

నిన్నటి కూరలేమైనా మిగిలాయేమో చూస్తా
ఈపూటకి ఓ పనయిపోదు...!
అమ్మ రోటిపచ్చడి వుంటే నెయ్యి కావాలి
కెలోరీలు, ఫాట్ బర్న్ లు అప్పట్లో తెలీదు కదా!

చెవి డాక్టర్ దగ్గరకెళ్ళి చాలారోజులయింది
ఫోన్ లో ఈమధ్య చాల తక్కువ మాట్లాడుతున్నా మరి
చెప్పా పెట్టకుండా తలుపు తట్టేవాళ్ళుంటే
ఎంత బాగుండునో...అదీ ఓ అదృష్టమేనేమోలే !

అరె సాయంత్రమయిపోతుంది...తనొచ్చేస్తాడు
కాసేపు ఈ అందమైన పంజరంలోంచి బయటకెగరాలి
అని అనుకున్నానే గానీ కారు అద్దాలు మూసేవున్నాయి
మా పూలమ్మి ఇప్పుడేం చేస్తుందో...!!

అర్ధరాత్రి దాకా ఏదో సినిమా సాగుతోంది
తెలీకుండా ఎప్పుడో నిద్రలోకి తప్పదన్నట్టు..!
వెన్నెల్లో తడుస్తున్న కొబ్బరాకుల చప్పుడు,
కిటికీపరదాలను పక్కకు జరిపే పారిజాతపరిమళాలు
అక్కడ నేను కనిపించక బావురుమంటున్నాయేమో...!

కష్టానికి, సుఖానికి ఒకటే స్పందన
అచ్చూ ఆగిపోయిన గుండె ఈ.సి.జి లాగ ఈజీవితం..!
అయినవాళ్ళ మధ్య ఎన్నో అనుభూతులతో
పడిలేచే తరంగాలుగా అక్కడి గుండెచప్పుడులోని నిండుతనం...!