కొన్ని ఏమీ కాని క్షణాలు

కొన్ని ఏమీ కాని క్షణాల్లోంచి

ఎలా వచ్చి వాలాయో తెలియని ఏకాంతాల్లోంచి

ఎంత విదిల్చుకున్నా బయటపడలేనితనంలోంచి

ఓ జ్ఞాపకాన్ని పాటగా చేసిపోయారు

రాసుకుంటూ వెళ్ళిపోయే ఎక్కడో గాలిపాటని

అర్ధాన్ని వెతుక్కోమనే ఒక మధ్యాహ్నపు నీడని

ఆగి ఆగి వినిపిస్తున్న క్రితం నవ్వుల చప్పుడుని

ఎవరో చుట్టేసుకుని వెళ్ళిపోయినట్టున్నారు

...అన్నీ నింపుకున్న ఖాళీ క్షణాల్లోంచి

ఎలాగోలా వచ్చి చేరే సన్నటి చిరునవ్వుని

అరమోడ్పు కన్నుల కింద కలల మధువుని

చెప్పా పెట్టకుండా దోచుకెళ్ళిపోయారు

ఎక్కడిదో మరి ఆ గ్రీష్మరాగం

ఎటో వలస పోతూ ఇటు విడిది చేసింది!