నువ్వొచ్చేటప్పుడు...

ఎన్నిసార్లు తిరిగొచ్చినా
మలిచూపులో ఎన్ని మంచు కాశ్మీరాలు
మళ్ళీ వస్తుందో రాదోననిపించే
మైనపు సందేహాలు
నువు నడిచెళ్ళిపోయిన గాలి అలలన్నీ
వెంటనే గొంతు సవరించుకుంటాయి
గుండెల్లో గిటార్ గీతాలవుతూ...
నువు తాకెళ్ళిపోయిన గోడలన్నిటి మీదుగా
చేతివేళ్ళతో రాస్తుంటాను
ఒకప్పటి 'అజనబీ'లా గుర్తొస్తావు
ఏదో నన్ను నేను దాచుకునే యత్నంలో
ఆలోచనలన్నీ మాల కడుతుంటానా
అక్కడా నీ జ్ఞాపకమై తప్పిపోతాను
నీతో నడిచెళ్ళిన దారిలో
ఇప్పుడొంటరిగా వెళ్ళాలంటే దిగులు
రాత్రిరెప్పల మీదుగా...అడవిపక్షుల శబ్ధాలపై
ఒక కలవెనుక పయనిస్తుంటా
హృదయాన్ని మాత్రమే నీ చేతుల్లో పెట్టి
ఒట్టి దేహమై నీకు దూరంగా నిల్చునేందుకు
ఒక ధ్వనిలోనో, ఒక స్పర్శలోనో,
కనుచూపుమేరలోనో , కాంతివేగంతోనో
నానిలువెత్తు సాక్ష్యం నగీషీలు చెక్కని నీ గుండెల్లో చూడాలి
అది మాత్రమే తీసుకునిరా నువ్వొచ్చేటప్పుడు....!