నీకోసం
ఒక అశ్రువు జారిందని తెలుసా
నీకోసం
ఒక అక్షరం ఒలికిందని తెలుసా

ఎన్ని తెలిసినా
అన్నీ మామూలుగానే జరిగిపోతున్నాయి

పెరట్లో పారిజాతాలు
అలానే బోర్లాపడుతూనే వున్నాయి
ఆ తెలుపూ-ఎరుపుల్లో
స్వచ్చతనీ, తీవ్రతనీ చూస్తుంటే
నీలాకాశం కింద నీ రహస్యం
సత్యమనిపిస్తుంది

ఎగిరే పక్షి రెక్కల్లో
ఎన్నేసి పదాలు దాచుకుంటూ వెళ్తుంది
వలస వెళ్ళేచోటల్లా
స్వేచ్చ తాలూకు కొత్త అర్ధాన్ని
జమేసుకుంటుంది కాబోలు
లేకుంటే, ఆరెక్కలకి
అంతటి విశాలత్వం ఎక్కడిది!?
కాస్త నా ఆలోచనకు అరువిస్తే బాగుణ్ణు!

వాలుతున్న పొద్దు
మినుక్కుమనే దీపాల్ని మింగలేకపోతుంది
ఆ చీకటి దారి కూడా
ఉండుండి వెళ్తున్న వాహనాల వెలుగుల్ని
దాచలేకపోతుంది

ఇక స్పందిచే హృదయం అన్ని మూలల్లోనూ
తడి నక్షత్రాలే
పున్నమి చంద్రుడిలో నీ దరహాసం చూసాక!